Newyddion Diweddaraf Cyngor Sir Y Fflint

Cymunedau lleol yn awyddus i redeg llyfrgelloedd lleol

Published: 14/01/2016

Bydd cynghorwyr yn ystyried ymateb tri chymuned i gynigion ar gyfer dyfodol tair llyfrgell wledig pan fyddant yn cyfarfod ddydd Mawrth 19 Ionawr. Mae gan grwpiau lleol yn yr Hôb a Mynydd Isa ddiddordeb mewn rhedeg y llyfrgelloedd rhan amser yn eu pentrefi, a hynny fel rhan o gynllun y Cyngor i weithio mewn partneriaeth â chymunedau i drosglwyddo rhai o’i asedau cymunedol. Gall cynghorau ddewis trosglwyddo adeiladau a thir i’r gymuned neu grwpiau elusennol er mwyn iddyn nhw gynnal yr adeiladau a’r gweithgareddau sydd dan fygythiad. Gallai unrhyw drefniant ar gyfer y ddwy lyfrgell fod ar waith erbyn 1 Ebrill, os bydd y Cabinet yn derbyn y cynnig. Yn Saltney, ystyrir cais gan gynghorwyr sir lleol i ymestyn y cyfnod a bennwyd i ymchwilio i atebion posibl i’r broblem yn lleol. Fis Mawrth diwethaf, cytunodd y Cabinet ar Gynllun Llyfrgell Tymor Canolig, a oedd yn amlinellu seilwaith cynaliadwy i’r llyfrgelloedd yn y dyfodol. Roedd yn cynnwys sefydlu canolfannau llyfrgell yn yr Wyddgrug, Treffynnon, Cei Connah, Canolfan Hamdden Glannau Dyfrdwy, Bwcle a’r Fflint. Mae’r posibilrwydd o drosglwyddo asedau cymunedau yn cael ei ystyried ar gyfer llyfrgelloedd gwledig. Bydd y gwaith o symud llyfrgelloedd Queensferry, Mancot a Phenarlâg i lyfrgell newydd yng Nghanolfan Hamdden Glannau Dyfrdwy wedi’i gwblhau erbyn 1 Mawrth. Drwy ddefnyddio’r cynllun Trosglwyddo Asedau Cymunedol ar gyfer llyfrgelloedd yr Hôb, Mynydd Isa a Saltney, gellid helpu’r Cyngor i sicrhau arbedion arfaethedig o £0.544m yn 2016/17 drwy’r cynllun hwnnw. Meddai’r Cynghorydd Chris Bithell, yr Aelod Cabinet dros Addysg: Rwy’n falch bod grwpiau lleol wedi dangos diddordeb brwd mewn datblygu ffyrdd eraill o sicrhau y bydd gweithgareddau’r llyfrgell yn parhau. Bydd y Cyngor yn gweithio gyda chymunedau lleol i sicrhau y bydd y newidiadau’n mynd rhagddynt yn ddidrafferth os caiff y cynigion eu derbyn. Oherwydd y pwysau ariannol presennol, nid oes gennym fawr o ddewis ond ystyried ffyrdd newydd o ddiogelu asedau lleol pwysig ac rydym yn croesawu cefnogaeth cymunedau lleol yn y cyswllt hwn.”